الرئيسية
شفت الرشيد بالحلم ذب دموع
يسال عالبلد واخبار يتگصد
سأل بغداد .هم بيها نفس الناس
ومن كل صوب عليها الناس تتردد
كتله بكل خجل لا وربك مو هيج
آهات.ظلم وقهر كل يوم تتجدد
ودعت خيرة ولد بس حصلت العظام
تغطت بالچفن التراب تتوسد
مجنون ذاك ونذل مارحم حتى اطفال
كام شايل حقد بصدورهم سدد
فاروق وعلي بدل بين الاثنين
لو حول صابئة لو بوذي لو اتهود
ولو ردت تطلع حد عتبة الباب
دوم ارفع سبابتك لله واتشهد
قبل كل الاهل چن رايح تموت
مو ملت هالنفس كل ساع تتهدد
ثابت على اسلامك غير بتزوير
لو تمش اعلى طولك من تكفر وترتد
ميليشا غدر تتجول بنص ليل
تريدك عالمشنقة وللجار تتودد
تهجير من ديرتك. وامتلت السجون
رددها حتى الاصم وبكولها اتعود
سنين كومة مضت بس ندفن اموات
بين شاب ومسن نخسر ونتكبد
چم حي بيها انظلم .واتحوط باسوار
بيا جرم ليش انسجن.وانحكم بمؤبد
انباك هذا الوطن.كطعوا اوصال
ذرة بعد ذرة للغير يتفرهد
غابة ابلا اسد حولوا هالگاع
بيا حگ اصبحت الاغراب تتسيد
مسكين هذا البلد ما يفرح ولو عيد
كل ما نكول فرجت تضيگ وتشتد
براء الالوسي: اجساد شبعت نزف.واللحم طشار
ولو نزف قطره الغرب عالقطرة يتندد
روح عد الثكالى لو فتش الانهار
طافن بالجثث. المايات هم تشهد
ورمان هذا الگلب .مبعوج بسچاچين
يا باب الندگه بساعته ينسد
اخوة اوية الحزن صرنا معاميل
رادوا حتى الرضيع يتگمط باسود
ورادوا هالشعب يتفرق احزاب
ورادوا حتى الفرات عن دجلة يتبعد
نعرف كل مدرسة تلتزم بالزي
واحنا قطعة سواد صار زينا الموحد
ردلي ولا يهم تفديها كوم اوطان
يا دولة التگوملك يا صاح تنشد
كلها اتخدرت واتخيطت الحلوگ
محد يمد ايده للاسف محد
دعي يالرشيد عالغمة بلچي تزول
وينشف هالدمع.الجروح تتضمد
وينبي كل النهدم وتنتهي الاوجاع
وتتحرر تاج المدن. الاحقاد هم تخمد
وينصان كل الدما وما نحفر گبور
وتلتم كل طائفة. ياريت نتوحد
